Kazimierz Kuratowski
Kazimierz (o ëdcò Casimir) Kuratowski (Varsavia, 2 ëd fërvé dël 1896 - 18 ëd giugn dël 1980) a l'é stait un dij pì grand matemàtich ëd Polònia.
La vita
Kuratowski a l'é stait dal 1927 professor ëd matemàtica al Politècnich ëd Lwow (Politechnika Lwowska) an Polònia, e dal 1934 a l'Università 'd Varsavia. Ant ël 1945 a l'é dventà mèmber ëd la Polska Akademia Umiejętności (Academia Polonèisa dl'Ansegnament), e ant ël 1952 dl'Academia Polonèisa dle Siense. Dal 1948 al 1967 a l'é stàit diretor ëd l'anstitù ëd matemàtica 'd dita academia, e për vàire agn a l'é stait ëdcò pressident ëd la International Mathematics Society e dla corispondenta Sossietà Matemàtica Polonèisa.
Kazimierz Kuratowski a frequentava l'avosà Kawiarnia Szkocka (Café scossèis), anté che ij matemàtich dla fiamenga scòla polonèisa dle prime desen-e dël sécol ch'a fa XX a costumavo ancontresse për confronté soe ideje.
L'arserca
L'arserca 'd Kuratowski a l'é staita ansentrà dzortut an slë studi dle struture métriche e topològiche astrate. Antra soe numerose contribussion a la matemàtica a van arcordà:
- Jë studi djë spassi polonèis (ch'a pijo sò nòm pròpe dai matemàtich polonèis ch'a l'han ëstudiaje, tanme Wacław Sierpiński, Alfred Tarski, e Kazimierz Kuratowski midem);
- La caraterisassion djë spassi ëd Hausdorff an dovrand j'ansidit assiòma ëd saradura 'd Kuratowski;
- La dimostrassion dël lema 'd Kuratowski-Zorn;
- An teoria dij graf, l'avosà caraterisassion dij graf planar, con ël teorema 'd Kuratowski për ij graf;
- La definission dël 1922 dla cobia ordinà tanme l'ansem .
- L'antrodussion dl'algoritm ëd Tarski-Kuratowski pr'ëstudié la complessità dij sot-ansem djë spassi topològich.
A pòrto sò nòm
- Algoritm ëd Tarski-Kuratowski.
- Assiòma ëd saradura 'd Kuratowski.
- Lema 'd Kuratowski-Zorn.
- Teorema 'd Kuratowski ant la teorìa dij graf.
- Teorema ëd Knaster-Kuratowski-Mazurkiewicz.
Euvre prinsipaj
- A Half Century of Polish Mathematics: Remebrances and Reflections (1980).